कमाइको हिस्सा बाबुआमालाई... ‘बाबुआमालाई नसम्झिनेहरूका लागि यो गतिलो पाठ हो।’

कमाइको हिस्सा बाबुआमालाई

 चीनको एक कम्पनीले आफ्ना कामदारलाई तलबको केही हिस्सा बाबुआमालाई दिनैपर्ने नियम बनाएको छ। बाबुआमाप्रति सन्तानको भक्तिको विषयले सामाजिक सञ्जालहरू तताएको छ।

धेरै स्थानमा ब्युटिपार्लर सञ्चालन गरिरहेको उक्त कम्पनीले आफ्ना कर्मचारी/कामदारबीच नैतिक मूल्य स्थापित गर्न खोजेको छ। चिनियाँ समाज र संस्कारमा बाबुआमालाई सम्मान गर्नु महत्त्वपूर्ण मूल्य मानिन्छ। तर, सामाजिक सञ्जालहरूमा कम्पनीले केही बढी नै गरेको टिप्पणी भइरहेको छ।

परम्परागत रूपमा धेरै चिनियाँ अभिभावक आफ्ना सन्तानको तलबको केही हिस्सा पाउने आशा गर्छन्। सन् २०१३ मा चीनले सन्तानोचित भक्ति बढाउने उद्देश्यले कानुन नै बनाएको छ। जसमा छुट्टिएर बसेका सन्तानले बारम्बार वृद्ध बाबुआमासँग भेट्नै पर्ने प्रावधान छ।

सम्मान बढाउँदै
सन्तानोचित भक्तिको चलन चलाउने ग्वाङझाउको ब्युटिपार्लर ‘चेन’ की प्रवक्ता लु मेइयेका अनुसार उक्त कम्पनीका अधिकांश कर्मचारी ग्रामीण क्षेत्रका युवा, कम शिक्षा लिएका र गरिब छन्। ‘हामी हाम्रा कर्मचारीले आफ्ना वृद्ध बाबुआमाप्रति सम्मान र कर्तव्य निर्वाह गरून् भन्ने चाहन्छौं,’ उनले भनिन्, ‘यसबाट कम्पनीप्रतिको सहानुभूतिसमेत बढ्ने आशा छ।’ उक्त कम्पनीले ३ वर्षदेखि यस्तो अभ्यास गर्दै आएको छ। नयाँ कर्मचारीलाई सुरुमै त्यसमा प्रतिबद्ध गराइन्छ, सहमत नहुनेलाई लिइँदैन।

कम्पनीका कर्मचारीको न्यूनतम पारिश्रमिक ३ हजार युआन (३ सय ९ डलर) छ। कम्पनीले हरेक महिना अविवाहितको १० र विवाहितको ५ प्रतिशत तलब सिधै बाबुआमाको खातामा जम्मा गरिदिन्छ। कर्मचारीलाई त्यसको क्षतिपूर्तिसमेत दिने गरिएको छ। भर्ना भएको पहिलो वर्ष १ सय र तीन वर्षभन्दा बढी भएका कर्मचारीलाई ३ सय युआन दिइन्छ।

‘तलब कर्मचारीलाई’
उक्त नियमबारे सामाजिक सञ्जालमा मिश्रित प्रतिक्रिया छ। केहीले त्यसलाई महत्त्वाकांक्षी र हस्तक्षेपकारी कदम भनेका छन्। ‘सन्तानोचित भक्ति र तलब फरक विषय हुन्। तलब कर्मचारीलाई दिने हो, बाबुआमालाई होइन। कम्पनीले आफ्नो कार्यक्षेत्रको हेक्का राख्नुपर्छ,’ माइक्रोब्लग विबोमा वाङचुआन हेसाङडेयुफुले लेखेका छन्। अर्का ब्लग प्रयोगकर्ता जियाजियापिसीले लेखेका छन्, ‘कम्पनीको नियत राम्रो छ तर निरंकुश पनि छ। सन्तानोचित भक्ति ह्दयदेखि नै उत्पन्न हुने हो, कसैको दबाबबाट होइन।’

केहीले भने मुक्तकण्ठले प्रशंसासमेत गरेका छन्। ‘आधुनिक युवा पुस्ता आफ्ना लागि कमाउँछन् र आफ्नै लागि खर्च गर्छन्,’ आइलिन सियाओदीले लेखेका छन्, ‘बाबुआमालाई नसम्झिनेहरूका लागि यो गतिलो पाठ हो।’